Më 16 maj 1999, në rrethana ende të paqarta, u zhduk veprimtari i njohur i Lëvizjes Kombëtare, Ukshin Hoti, shkruan Gazeta Sinjali.
Ukshin Hoti, i lindur më 17 qershor 1943 në Krushë të Madhe të Rahovecit, ishte profesor, filozof, shkrimtar dhe atdhetar i shquar, i angazhuar në çështjen kombëtare gjatë viteve 1981-1999. Ai kishte dhënë ligjërata në disa universitete amerikane, ku edhe kishte studiuar dhe diplomuar.
Për aktivitetet e tij atdhetare, Ukshin Hoti ishte arrestuar disa herë nga regjimi serb, fillimisht i Titos dhe më pas i Millosheviqit. Arrestimi i fundit ndodhi në vitin 1994, kur u akuzua për veprimtari armiqësore ndaj Jugosllavisë dhe për pjesëmarrje në lëvizjen për Republikën e Kosovës. Ai u dënua me pesë vjet burg.
Pas lirimit nga burgu i Dubravës më 16 maj 1999, Ukshin Hoti u zhduk nga policia serbe pa lënë asnjë gjurmë. Dëshmitarë, përfshirë shokët e burgut dhe të mbijetuarit e masakrës në Dubravë, treguan se ai ishte liruar pikërisht në një ditë të dielë, kur lirimi i të burgosurve zakonisht nuk praktikohej.
Që nga ajo ditë e deri sot, Ukshin Hoti mbetet i zhdukur dhe konsiderohet simbol i përkushtimit dhe sakrificës për çështjen kombëtare.
