Malisheva ndalet nga Feronikeli 74, lideri shpërdoron penalltinë dhe humbet pikë në shtëpi

Malisheva dhe Feronikeli 74 janë ndarë në barazim pa gola (0-0), në stadiumin “Liman Gegaj”, në takimin e vlefshëm për javën e 12-të të Superligës së Kosovës.

Skuadra vendase e nisi më mirë ndeshjen dhe arriti të gjente rrugën drejt rrjetës që në minutat e para, por goli u anulua pas ndërhyrjes së sistemit VAR.

Malisheva vijoi të kërkonte golin e avantazhit dhe në minutën e 35-të pati mundësinë ideale për të kaluar në epërsi.

Megjithatë, Xhemail Ibishi nuk arriti të shfrytëzonte penalltinë, pasi goditja e tij u prit nga portieri i Feronikelit 74, Agron Kolaj.

Në pjesën e dytë, lideri i kampionatit provoi të ndryshonte rrjedhën e takimit përmes disa zëvendësimeve, duke kërkuar më shumë forcë dhe konkretizim në fazën ofensive.

Megjithatë, Feronikeli 74, i drejtuar nga Elon Berisha, u tregua mjaft i organizuar në prapavijë dhe arriti t’i rezistonte presionit të vendasve deri në vërshëllimën e fundit.

Në këtë mënyrë, të dyja skuadrat u detyruan të ndanin nga një pikë, me Malishevën që do të ketë shumë për të reflektuar pas shpërdorimit të 11-metërshit.Pavarësisht barazimit,

Malisheva mbetet në krye të klasifikimit me 27 pikë, ndërsa Feronikeli 74 shkon në kuotën e 12 pikëve.