Turqi – Hetim ndaj 19 personazheve të njohur për përdorim të dyshuar të narkotikëve
Autoritetet turke kanë nisur një hetim ndaj 19 personazheve të njohur të jetës publike, për dyshime mbi përdorimin e substancave narkotike. Mes të përfshirëve janë emra të njohur të skenës muzikore, televizive dhe rrjeteve sociale.
Në listën e personave të hetuar përfshihen këngëtaret Hadise Açıkgöz dhe İrem Derici, aktoret Demet Evgar dhe Berrak Tüzünataç, si dhe influencueset Duygu Özaslan dhe Derin Talu.
Prokuroria e Përgjithshme e Stambollit ka konfirmuar se çështja është hapur në bazë të nenit që lidhet me përdorimin e substancave narkotike ose stimuluese, sipas Kodit Penal të Turqisë. Aktualisht nuk ka urdhra arresti, por të gjithë të dyshuarit janë thirrur për të dhënë deklarata dhe për të kryer testime toksikologjike përmes gjakut.
Operacioni u zhvillua nga Komanda Provinciale e Xhandarmerisë së Stambollit, e cila i shoqëroi personazhet në qendra shëndetësore për marrjen e mostrave të gjakut dhe më pas në ambientet e autoriteteve për marrjen e dëshmive.
Përveç emrave të përmendur më lart, në listë janë edhe: Ziynet Sali, Kubilay Aka, Kaan Yıldırım, Mert Yazıcıoğlu, Metin Akdülger, Ceren Moray, Özge Özpirinçci, Engin Polat, Dilan Polat, Zeynep Meriç Aral, Birce Akalay dhe avokatja Feyza Altun.
Sipas legjislacionit turk, përdorimi personal i narkotikëve nuk dënohet automatikisht me burgim. Në këto raste, personi mund të detyrohet të ndjekë trajtim, rehabilitim ose të vendoset nën mbikëqyrje provizore, sipas vlerësimeve të ekspertëve dhe prokurorisë.
Hetimi ndodhet ende në fazat fillestare, dhe do të bazohet kryesisht në rezultatet e analizave toksikologjike dhe vlerësimet ligjore pasuese.
