Përgatiti: Sara Shehu
Disa në këmbë e disa të tjerë të ulur në ulëse të improvizuara, presin autobusin në mungesë të një pritore adekuate.
Sipas qytetarëve, Komuna duhet bërë zgjidhje.
“Shumë keq duhet me bo një pritore me mbulesë. Këto karrika që janë nuk kryjnë punë shumë keq për ne të moshuarit është kjo gjendje. Unë e frekuentoj këtë stacion shumë, në reshje të shiut nuk kemi as si të mbrohemi”, tha një qytetar.
“Është shumë shqetësuese, gruan e kam të sëmurë prej venave, ne gjithmonë presim në këtë stacion në këmbë për shkak se nuk ka një pritore me karrike, po e kemi të vështirë të presim autobusin kështu”, tha një tjetër qytetar.
Projekti për vendosjen e 150 pritorëve ishte paraparë të përfundojë brenda vitit 2023, por projekti nuk është realizuar as në gjashtëmujorin e parë të këtij viti.
“Ky projekt ka qenë para ardhjes time në pozitë. Disa nga pritoret në kryeqytet veçse janë vendosur të reja. Por projekti nuk është aty ku do duhej të ishte. Deri më tani numri i pritoreve të vendosura është bukur i vogël. Në dy muajt e ardhshëm po presim që t’i vendosim edhe 18 pritore të reja. Do të rrisim dinamikën e punës. Puna është stërzgjatur pasi ende nuk ishin përcaktuar saktë lokacionet për vendosjen e tyre”, tha drejtori i Shërbimeve Publike në Prishtinë, Bekim Bestrovci.
Projekti i cili filloi në shtator të 2022-s kap vlerën prej 200 mijë eurosh.
