Përgatiti: Kastriot Tahiri
Erërat e forta të 18 janarit, rrëzuan një pjesë të çatisë së komunës së Prishtinës, duke lënduar rëndë Elza Ujkanin, e cila për disa momente mbeti nën gërmadha.
Si pasojë e plagëve, 23 vjeçja, u dërgua në QKUK për t’u operuar, dhe u lirua tek pas 2 muajsh trajtim.
Prokuroria kishte nisur hetimet, të cilat rezultuan me ndalimin e menaxherit të projektit dhe pronarit të kompanisë që kishte kryer rinovimin e çatisë.
Pesë muaj pas, Demokracia Plus publikoi një analizë për pjesën e prokurimit të kontratës për rinovimin e kulmit e cila rezulton se në dy raste të ndryshme kompania ishte dënuar për falsifikim dhe mashtrim në prokurim publik.
“Në rastin e parë kompania NBT-ING Sh.P.K., në vitin 2018 kishte falsifikuar dokumente në tenderin për ndërtimin e rrugës Mushtisht-Vërbeshticë-Shtërpc, në vlerë të parashikuar të kontratës 1 milion euro të iniciuar nga kompania e Suharekës. Gjykata Themelore në Prizren kishte shpallur fajtor pronarin e kompanisë, për veprën penale falsifikim i dokumenteve dhe i shqiptoi gjobë në vlerë prej 900 euro. Rasti i dytë Kompania NTB-ING Sh.P.K., vazhdoi të fitojë kontrata publike, dhe në rastin e dytë është në vitin 2020 në tenderin ‘Renovimi i objektit të Prokurorisë Speciale’, në vlerë rreth 1 milion euro. Pavarësisht dy rasteve të dënimit nga ana e gjykatës, kjo kompani vazhdojë të fitojë tender publik dhe deri tek rasti i Komunës së Prishtinës, ku ra kulmi”, tha Dragusha nga Demokraci Plus.
Dënimet e tilla sipas anëtarëve të shoqërisë civile që janë angazhuar në hulumtim, nuk janë në proporcion me nivelin e rrezikut.
“Këto dallime në mes të vendimeve të gjykatave dhe shkeljeve po shpërfaqin një mos përputhje në vendimmarrje prej organeve kompetente. Gjithashtu po inkurajojnë operatorët ekonomik që të vazhdojnë me kryerjen e këtyre vendimeve. Andaj, në këtë linjë Demokraci Plus rekomandon që kurdo që ka raste kur dërgohen dokumente të falsifikuara, autoritetet kontraktuese të përdorin listën e zezë dhe të diskualifikojnë operatorët ekonomik. Gjithashtu, gjykata gjatë marrjes së vendimit të kenë parasysh rrezikun e shkaktuar nga shkelja dhe të shqiptojnë dënime në proporcion me rrezikun e shkaktuar”, tha Egzona Kozhani nga Demokracia Plus.
Objekti i komunës së Prishtinës është përuruar në vitin 2009. Por, çatia u rindërtua edhe njëherë në vitin 2023. Tenderin 380 mijë eurosh, për ta kryer këtë punë e kishte fituar kompania nga Komuna e Suharekës.
