Partia Demokratike e Kosovës (PDK) ka dërguar sot në Gjykatën Kushtetuese ligjin për zyrtarët publikë.
Lajmi është bërë i ditur nga shefi i Grupit parlamentar të PDK-së Abelard Tahiri përmes një postimi në Facebook.
“Ashtu siç kemi paralajmëruar muaj më parë, sot e dërguam në Gjykatën Kushtetuese ligjin që shumica parlamentare e miratoi javën e kaluar dhe me të cilin ndryshohet dhe plotësohet Ligji në fuqi për Zyrtarët Publik. Sikurse, këtë të fundit, kur dy vjet më parë e dërguam në gjykatë, ashtu edhe tani ndryshim-plotësimin e tij, e kemi dërguar për të pamundësuar politizimin e partizimin e administratës publike dhe për të parandaluar degradimin e sistemit të meritokracisë, karrierës dhe pavarësisë së administratës, detyrë e të cilës është ti shërbej me zell e profesionalizëm të gjithë qytetarëve pa dallim, e mos të kthehet si instrument politik i pushtetit”, ka shkruar ai.
Tahiri ka thënë se zyrtarët publikë “janë investim afatgjatë i shtetit dhe i partnerëve tanë dhe nuk do të lejojmë që t’i nënshtrohen presioneve e agjendave politike.”
“Aktgjykimi i Gjykatës Kushtetuese i verës së vitit 2023, i konfirmoi në tërësi pretendimet tona, ndërsa Kuvendi me këtë rast, ishte i obliguar që brenda gjashtë muajsh ti adresoj të gjitha shkeljet. Sot, rreth një vit e gjysmë pas, jo vetëm që dështuan ta përgatisin më kohë ligjin e ri, por akoma më keq, i përsëritën një pjesë të shkeljeve në të njëjtën mënyrë. Prandaj, kontestimi i këtij ligji në Gjykatën Kushtetuese nuk është rastësi dhe paraqet, njëkohësisht, edhe një dëshmi të angazhimit tonë konsistent për mbrojtjen e vlerave dhe rendit kushtetues”, ka përfunduar ai.
Ndryshe, ligji për zyrtarët publikë është dërguar në Kushtetuese edhe nga partia tjetër opozitare, Lidhja Demokratike e Kosovës.
