OpenAI prezanton ChatGPT Atlas – shfletuesin që sfidon Google Chrome
OpenAI prezantoi të martën ChatGPT Atlas, një shfletues interneti të mbështetur nga inteligjenca artificiale dhe të integruar plotësisht me chatbot-in e njohur ChatGPT.
Atlas u mundëson përdoruesve të hapin një panel të ChatGPT në çdo faqe interneti, për të përmbledhur përmbajtje, krahasuar produkte apo analizuar të dhëna në kohë reale.
Në versionin “Agent Mode”, i cili është tashmë i disponueshëm për përdoruesit me abonim, ChatGPT mund të ndërveprojë drejtpërdrejt me faqet, duke kryer detyra nga fillimi në fund – nga kërkimet online deri te blerjet automatike.
Gjatë një demonstrimi, zhvilluesit e OpenAI treguan sesi ChatGPT, përmes Atlas, mund të gjejë një recetë online dhe të blejë automatikisht përbërësit e nevojshëm.
Aktualisht, shfletuesi është i qasshëm globalisht për macOS, ndërsa versionet për Windows, iOS dhe Android pritet të publikohen së shpejti.
Me Atlas, OpenAI synon të krijojë një ekosistem të integruar të AI-së që mbledh informacion, mëson nga ndërveprimet dhe ndihmon përdoruesit në aktivitetet e tyre të përditshme online.
Në reagim ndaj këtij zhvillimi, Google ka filluar integrimin e modelit AI Gemini në Chrome për përdoruesit në SHBA, me plane për ta zgjeruar edhe në aplikacionin iOS.
Megjithatë, Google Chrome vazhdon të mbajë epërsinë në treg me 71.9% të pjesës globale, por analistët parashikojnë se ChatGPT Atlas mund të krijojë konkurrencë serioze, veçanërisht në fushën e reklamave online.
