Shefi i Misionit të Kosovës në Bruksel, Agron Bajrami, ka takuar të hënën shefin e kabinetit të Komisioneres së Bashkimit Evropian për Zgjerim, Marko Makovec, ku në qendër të diskutimit ishte procesi i zgjerimit të BE-së në Ballkanin Perëndimor dhe perspektivat “afatshkurtra, afatmesme dhe afatgjata” të integrimit të Kosovës në BE.
“Ambasadori Bajrami dhe z. Makovec shkëmbyen pikëpamje edhe mbi Planin e Rritjes dhe instrumentet e tjera të BE-së për të avancuar projektin strategjik të zgjerimit në rajon”, thuhet në njoftimin e lëshuar për shtyp nga zyra e Kosovës në Bruksel.
Nga gjashtë vendet e Ballkanit Perëndimor, përveç Kosovës, të gjitha ose kanë statusin e kandidatit për anëtarësim në klubin eksluziv evropian, ose kanë nisur tashmë negociatat. Kosova ka dorëzuar aplikacionin për anëtarësim në BE në vitin 2022.
Kosova prej shpalljes së pavarësisë në vitin 2008 e ka përcaktuar qartë orientimin e saj drejt integrimit në BE dhe NATO, në kuadër të përpjekjeve për të siguruar stabilitet afatgjatë dhe zhvillim ekonomik, si garanci për paqe në Ballkanin Perëndimor.
Ndryshe, shefja e Komisionit Evropian, Ursula von der Leyen, ka deklaruar se është e rëndësishme për Kosovën të vazhdojë të ndërtojë institucione të fuqishme dhe t’i zbusë tensionet në veri, pas takimeve me udhëheqësit e vendit më 15 tetor në Prishtinë.
