Zgjimi herët në mëngjes për punë apo shkollë nuk është gjithmonë i lehtë. Dalja nga shtrati i ngrohtë dhe përballja me ritmin e ditës mund të jetë stresuese. Megjithatë, disa zakone të vogla që bëjmë sapo hapim sytë mund ta përkeqësojnë këtë moment – madje edhe të ndikojnë në shëndet. Ja çfarë duhet të shmangni:
1. Mos u ngrini menjëherë nga shtrati
Të çoheni menjëherë në këmbë sapo bie zilja e alarmit mund të dëmtojë muskujt dhe shpinën. Jepini trupit disa minuta që të zgjohet gradualisht. Shtrihuni lehtë, lëvizni krahët dhe këmbët dhe pastaj ngrihuni me kujdes.
2. Mos u vishni në errësirë
Nëse zgjoheni para pjesëtarëve të tjerë të familjes, mund të tundoheni të përgatiteni në errësirë. Kjo rrit rrezikun e rrëzimit dhe ndikon në ritmin biologjik. Zgjidhja më e mirë është të përgatisni rrobat që në mbrëmje.
3. Mos e shtyni vazhdimisht zilen e alarmit
Aktivizimi i “snooze” disa herë krijon stres fizik dhe mendor. Trupi fillon e ndalon procesin e zgjimit disa herë radhazi, gjë që e bën më të vështirë nisjen e ditës me energji.
4. Mos bëni ushtrime të rënda menjëherë
Menjëherë pas zgjimit, trupi është ende i “mpirë”. Ushtrimet intensive mund të shkaktojnë tendosje. Prisni të paktën 30 minuta dhe në fillim zgjidhni aktivitete të lehta si joga apo pilates.
5. Mos hani menjëherë sapo të zgjoheni
Rekomandohet që fillimisht të pini një gotë ujë në temperaturë ambienti. Për të aktivizuar sistemin tretës, mund të pini ujë të ngrohtë me pak lëng limoni. Më pas mund të konsumoni mëngjesin normal.
Ndryshime të vogla në rutinën e mëngjesit mund ta bëjnë fillimin e ditës më të lehtë, më të shëndetshëm dhe më energjik.
