Ministri i Jashtëm i Zvicrës viziton sot Kosovën – takohet me presidenten, Kurtin dhe Konjufcën

Ministri i Jashtëm i Zvicrës, Ignazio Cassis, do të vizitojë Kosovën më 5 nëntor, në kuadër të një turi zyrtar në tri shtete të Ballkanit Perëndimor, i cili do të zhvillohet nga 4 deri më 6 nëntor.

Sipas njoftimit të Departamentit Federal të Punëve të Jashtme të Zvicrës, të publikuar më 3 nëntor, vizita do të përqendrohet në forcimin e marrëdhënieve dypalëshe, integrimin evropian dhe promovimin e paqes, stabilitetit e sigurisë në rajonin e Ballkanit Perëndimor.

Gjatë qëndrimit në Prishtinë, Cassis pritet të zhvillojë takime me presidenten e Kosovës, Justina Shiroka Pula, kryeministrin Albin Kurti dhe ministrin e Punëve të Jashtme, Glauk Konjufca.

Në mesin e temave kryesore që pritet të diskutohen është marrëveshja e tregtisë së lirë ndërmjet Kosovës dhe Zvicrës, në kuadër të Asociacionit Evropian të Tregtisë së Lirë (EFTA), e cila ka hyrë së fundmi në fuqi. Po ashtu, në agjendë do të jetë edhe mbështetja zvicerane për dialogun ndërmjet Kosovës dhe Serbisë.

Gjatë vizitës në Kosovë, ministri zviceran do të qëndrojë edhe në misionin paqeruajtës të NATO-s, KFOR, ku Zvicra kontribuon që nga viti 1999 përmes kontingjentit të saj SWISSCOY.

Cassis, në cilësinë e kryesuesit aktual të Organizatës për Siguri dhe Bashkëpunim në Evropë (OSBE), do të vizitojë gjithashtu misionet e kësaj organizate në Prishtinë, Beograd dhe Shkup, për t’u njohur nga afër me punën dhe sfidat me të cilat përballen në terren.

Departamenti Federal i Punëve të Jashtme ka bërë të ditur se kjo vizitë riafirmon lidhjet e ngushta të Zvicrës me vendet e Ballkanit Perëndimor, të cilat janë forcuar ndër vite edhe përmes diasporës së madhe nga ky rajon që jeton dhe vepron në Zvicër.

Në kuadër të qëndrimit në Beograd dhe Prishtinë, Cassis do të marrë pjesë edhe në inaugurimin e hapësirave të reja të ambasadave zvicerane.

Sipas autoriteteve zvicerane, gjatë takimeve do të vihet theksi te rëndësia e dialogut, trajtimit të së kaluarës dhe mbrojtjes së të gjitha komuniteteve.