Në kuadër të Samitit të 12 të Procesit të Berlinit, udhëheqësit e Ballkanit Perendimorë së bashku me krerët e disa shteteve të Bashkimit Evropian u mbledhën në kryeqytetin e Britanisë së Madhe në Londër.
Kosova u përfaqësua nga kryeministri në detyrë, Albin Kurti.
Ai u mirëprit në samit nga sekretarja e Shtetit për Punë të Jashtme të Mbretërisë së Bashkuar, Yvette Cooper.
Udhëheqësit biseduan për forcimin e bashkëpunimit politik, ekonomik dhe infrastrukturor, si dhe përshpejtimin e integrimit evropian të vendeve të Ballkanit.
Kryeministri në detyrë i Kosovës menjëherë pas përfundimit të samitit bëri publik fjalimin e tij.
Kurti bëri thirrje që sulmi terrorist në Banjskë të mos injorohet.
“Sulmi terrorist në Banjskë nuk mund të injorohet. Milan Radoiçiq ka pranuar përgjegjësinë, megjithatë drejtësia ende nuk është vënë në vend. Fqinjit tonë armiqësor në veri nuk duhet t’i lejohet të veprojë me pandëshkueshmëri, pasi kjo nxit inkursione të reja dhe dërgon një sinjal të rrezikshëm se sulmet ndaj sovranitetit dhe integritetit territorial të Kosovës mund të mbeten të pandëshkuara,” tha Kurti.
Kryeministri në detyrë shtoi se gjatë 5 viteve të fundit Kosova ka bërë përparimin më të shpejtë në treguesit demokratikë, ekonomikë dhe të sigurisë.
“Kemi pasur një mesatare prej 6% rritje ekonomike dhe asnjëherë më pak se 4%. Para tre muajsh, Banka Botërore dhe FMN e hoqën Kosovën nga lista e vendeve të brishta dhe të prekura nga konfliktet, duke njohur kështu qëndrueshmërinë, stabilitetin dhe qeverisjen e mirë që kemi ndërtuar,”shtoi kryeministri në dorëheqje.
Në këtë samit merr pjesë për herë të parë edhe kancelari i Gjermanisë, Friedrich Merz.
Një ditë para samitit, të martën, Mbreti britanik Charles III e organizoi një pritje për pjesëmarrësit.
Procesi i Berlinit është nismë diplomatike e themeluar në vitin 2014 nga kancelarja e atëhershme e Gjermanisë, Angela Merkel, e cila synon afrimin e vendeve të rajonit me Bashkimin Evropian.
Deri më tani, udhëheqësit e Ballkanit Perëndimor dhe BE-së janë takuar 11 herë: katër herë në Berlin dhe nga një herë në Londër, Vjenë, Paris, Trieste, Poznan, Sofje dhe Tiranë.
Në linkun më poshtë mund të gjeni edicionin lajmeve qendrore të plotë!
