Pak orë para se Policia të sulmohet gjatë arrestimit të Milun Milenkovicit, i dyshuar për organizim të trazirave në Zveçan, kryeministri Albin Kurti u ka prezantuar ambasadorëve të QUINT-it propozimin e tij për uljen e tensioneve në veri të Kosovës.
Planin e tij pesëpikësh, kryeministri Kurti tha se e ka ndarë paraprakisht me kryediplomatin evropian, Josep Borell, teksa i ka dërguar letër.
“Si pikë e parë në letrën time dërguar Josep Borrelit, është sundimi i ligjit në katër komunat në veri, që nënkupton identifikimin, ndjekjen penale dhe gjykimin e drejtë të të gjithë anëtarëve të grupeve kriminale që kanë sulmuar Policinë, trupat e NATO-s dhe gazetarët. Si pikë e dytë: Grupet e dhunshme të tërhiqen menjëherë nga territori i Kosovës dhe të ndalohet çdo akt kriminal kundër institucioneve të Kosovës. Bazuar në parimin e proporcionalitetit, prania e forcave të Policisë së Kosovës në tri ndërtesat komunale në veri të Kosovës do të zvogëlohet, në përputhje me rrethanat”, tha Kurti.
Si veprim i tretë, sipas kryeqeveritarit, parashihet që Policia e Kosovës së bashku me pjesëtarë të NATO-s dhe EULEX-i, të kryejnë vlerësime të përbashkëta të sigurisë çdo 15 ditë.
“Katër, Qeveria e Kosovës do të koordinohet me të gjithë akterët dhe do t’i shpallë zgjedhjet e parakohshme në katër komunat në veri. Zgjedhjet e reja duhet të organizohen në një atmosferë zgjedhore të lirë, demokratike dhe të papenguar. Pesë: Kosova dhe Serbia të kthehen menjëherë në dialogun e ndërmjetësuar nga Brukseli. BE-ja të sigurojë një plan renditjeje të drejtë dhe të balancuar për zbatimin e Marrëveshjes Bazë (27 shkurt) dhe Aneksit të Zbatimit të saj (18 mars). Udhëheqësit e dy shteteve të takohen në një dialog të nivelit të lartë në Bruksel, gjatë kësaj jave”, tha Kurti.
Mes tjerash, kryeministri Albin Kurti theksoi se kryetarëve shqiptarë të komunave veriore nuk mund t’ua kërkojë dorëheqjen, pasi që do të ishte kundërkushtetuese, duke e quajtur ide të mirë atë të presidentes Vjosa Osmani për një peticion.
Në lidhje me propozimin e tij për uljen e tensioneve, kryeministri kosovar po pret përgjigje nga Brukseli.
Ndërkaq, gjatë ditës zyrtarë nga Bashkimi Evropian nuk janë përgjigjur në pyetjet e televizionit lidhur me propozimet e Kurtit. /atvlive.tv
Edicionin Qendror të lajmeve në ATV e gjeni në videon më poshtë:
