Kosova ka bazë të mjaftueshme juridike dhe mjaftueshëm fakte që ta paditë Serbinë për gjenocid.
Kështu vlerëson profesori universitar, Arsim Bajrami, i cili sot promovoi edhe një libër që dokumenton krimet e kryera gjatë luftës në Kosovë.
Megjithatë, ai vlerëson se nuk duhet ngutur me padinë.
“Të gjitha kushtet për ushtrimin e padisë ndaj Serbisë janë plotësuar, por Kosova nuk duhet të nxitohet me ba padinë pa u përgatitë mirë. Kjo nuk është një çështje politike e një kryeministri apo e një fushate zgjedhore, por është një çështje shtetërore dhe kur të bëhet padia duhet të jemi të sigurt që do ta fitojmë rastin, sepse humbja eventuale e rastit na e dëmton esencialisht historinë”, tha Bajrami.
Ndonjë datë e përafërt nuk u dha, por megjithatë, padia është afër përfundimit, sipas kreut të Kuvendit, Glauk Konjufca.
“Mund të konstatoj se kjo për të cilën po bëni pyetje është shumë afër. Nuk mund të jap muaj apo afate të caktuara, veçse e di që është bërë një punë e madhe deri tash, janë konsultuar edhe personat më të rëndësishëm profesionalë”, tha Konjufca.
Padisë ndaj Serbisë i gëzohet edhe opozita, por ka vërejtje në mostransparencë, pasi, sipas saj nuk kanë asnjë njohuri rreth saj.
“Sikur për shumë procese të tjera as për këtë nuk dimë asgjë, sepse nuk kemi qenë të involvuar dhe nuk e dimë kjo “shumë afër” çfarë nënkupton, ku janë afër, çfarë është përgatitur, kush janë ato ekipe që kanë punu, pra nëse janë afër krejt çka mundem me thanë është se është një lajm i mirë”, tha shefi i GP të PDK-së, Abelard Tahiri.
Sidoqoftë padia për gjenocid ndaj Serbisë, ka qenë edhe një nga zotimet kryesore të qeverisë Kurti, para se ta marrë mandatin qeverisës. /atvlive.tv
Edicionin Qendror të lajmeve e gjeni në videon më poshtë:
