Komisioni për Kulturë miraton në parim Projektligjin për Inspektoratin e Trashëgimisë Kulturore

Me të gjitha votat për, asnjë kundër dhe asnjë abstenim, Komisioni për Kulturë, Turizëm, Sport dhe Rini ka miratuar në parim Projektligjin për Inspektoratin Qendror të Trashëgimisë Kulturore, raporton Ekonomia Online.

Ministrja e Kulturës dhe Turizmit, Saranda Bogujevci, gjatë prezantimit të projektligjit para anëtarëve të komisionit, tha se përmes tij synohet fuqizimi i inspektoratit dhe rritja e kapaciteteve për mbrojtjen e trashëgimisë kulturore në tërë territorin e Kosovës.

Bogujevci tha se me këtë projektligj Inspektorati Qendror i Trashëgimisë Kulturore parashihet të themelohet si agjenci ekzekutive, duke mundësuar rritjen e numrit të inspektorëve dhe përmirësimin e kushteve për inspektimin e monumenteve.

“Me qëllim të avancimit të sistemit të inspektimeve në vendin tonë, pas miratimit të ligjit për inspektime dhe pas themelimit të zyrës së Inspektoratit të Përgjithshëm, ku është paraparë rregullimi i bazës ligjore për funksionim të inspektorateve qendrore, Ministria e Kulturës dhe Turizmit ka hartuar projektligjin për Inspektoratin Qendror të Trashëgimisë Kulturore. Nëpërmjet këtij ligji, themelohej Inspektorati Qendror i Trashëgimisë Kulturore si agjenci ekzekutive, duke mundësuar kështu përmirësimin e kushteve të ruajtjes dhe mbrojtjes së trashëgimisë kulturore në vend. Me këtë hap, ne fuqizojmë Inspektoratin e Trashëgimisë Kulturore, duke e ngritur në nivel të agjencisë shtetërore. Me një formë të tillë ligjore, ne rrisim kapacitetet inspektuese dhe konsolidojmë kushtet për inspektim, inspektimin e trashëgimisë kulturore në tërë territorin e Kosovës. Ky mekanizëm institucional, në bashkëpunim të ngushtë edhe me koordinimin me organe të tjera inspektuese qendrore dhe lokale, si dhe me Inspektoratin e Përgjithshëm, do të sigurojë përmirësimin e procesit të inspektimeve krahas mbrojtjes dhe përmirësimit të gjendjes së monumenteve të trashëgimisë kulturore, duke krijuar një mjedis më të sigurt për monumentet me vlera në Republikën e Kosovës. Rritet numri i inspektorëve”, tha ajo.

Gjatë diskutimit, deputeti i LDK-së, Parsi Guri, ngriti çështjen e pavarësisë së këtij institucioni, duke pyetur se si do të garantohet ajo, kur kryeinspektori do të raportojë te ministri.

Ai kërkoi gjithashtu sqarime për llojet e donacioneve nga të cilat mund të financohet inspektorati, sipas dispozitave të projektligjit.

Në përgjigje, ministrja Bogujevci tha se mënyra e funksionimit dhe raportimit të agjencisë përcaktohet nga Ligji për Administratën Shtetërore.

“Ministria nuk e rregullon se si funksionon agjencia, për shkak që ligji për administratën e përcakton qysh funksionon dhe qysh janë format e raportimit”, tha ajo.

Ndërkaq, deputetja e PDK-së, Eliza Hoxha, kërkoi sqarime lidhur me statusin dhe organizimin e inspektoratit, konkretisht nëse qendrat do t’i raportojnë Inspektoratit Qendror.

Ministrja tha se kapacitetet aktuale të inspektorateve nuk mundësojnë mbulimin e të gjithë territorit të Kosovës dhe se projektligji synon fuqizimin e inspektimit pa ndërhyrë në kompetencat e institucioneve të tjera.

“Me inspektoret aktuale nuk mund të mbulohet tërë territori i Kosovës. Ka organizime të tjera të inspektimit, ka për qëllim me fuqizu pjesën e inspektorëve për atë vjen në agjenci. Kjo është e konsultuar me ligjin për trashëgimi. Nuk i ndërhyn as kujt në kompetencat e veta”, tha ministrja.

Kurse, deputeti Albert Kinolli, ngriti edhe çështjen e Hamamit të Gazi Mehmed Pashës në Prizren, i cili, sipas tij, prej disa vitesh është duke u rinovuar, ndërsa vizitorët që shkojnë për ta parë monumentin i gjejnë dyert e mbyllura.

Ai propozoi rritjen e numrit të inspektorëve, ndërsa ministrja tha se pikërisht ky është një nga synimet e projektligjit, për të rritur kapacitetet dhe për të mundësuar mbulimin e tërë territorit të Kosovës.