Deputeti i Lëvizjes Vetëvendosje, Ilir Kërçeli ka deklaruar se janë në pritje edhe të një tak imi në mes Albin Kurtit dhe liderëve të partive opozitare.
Sipas tij para se të kalohet edhe tek votimi i nënkryetarëve, kryetarit të Kuvendit e qeverisë duhet një marrëveshje dhe për postin e presidentit.
“Jemi në pritje të një takimi me subjektet politike për arritjen e një marrëveshje gjithëpërfshirëse për të gjitha pozitat e institucioneve të Republikës së Kosovës. Deri tash unë për veti nuk jam i informuar nëse është bërë edhe një tentim për takim të radhës me liderët e partive politike. Sa i përket afatit kushtetues ne s’i kemi as gjashtë ditë prej se jemi betuar si deputetë e para kësaj s’kemi mundur të takohemi e të thërrasim seancë”, deklaroi ai.
Kërçeli tha se nuk ka ndonjë informacion nëse pritet që së shpejti të ketë një takim.
“Kurse sa i përket rreth 48 orëshit mendojmë se opozita po deklaron se duhet zgjedhur kryetari dhe kryesia e kuvendit, por pas saj vjen votimi për qeverinë dhe presidentin dhe Vetëvendosje konsideron se së pari duhet të kemi një marrëveshje gjithëpërfshirëse për të gjitha pozitat para se të votohet kryetari dhe nënkryetarët”.
