Një karrocë origjinale e viteve 1890, e përdorur në filmin “Wuthering Heights”, është nxjerrë në shitje për 100,000 paund, ose rreth 114 mijë euro. E njohur si “Karroca Heathcliff”, ajo u përdor në skenat ku udhëtonin personazhet e interpretuar nga Margot Robbie dhe Jacob Elordi, duke u kthyer në një nga elementet më të veçanta të produksionit.
Karroca e tërhequr nga kuajt është listuar në platformën britanike Autotrader. Ajo është e pajisur me ndenjëse lëkure ngjyrë kafe dhe është ndërtuar për t’u tërhequr nga dy ose katër kuaj. Për rreth 20 vite ka qenë në pronësi të kompanisë së akrobacive dhe rekuizitave Steve Dent Ltd, e cila ka bashkëpunuar me realizuesit e filmit.
Erin Baker, drejtoreshë editoriale në Autotrader, e cilësoi këtë si një nga listimet më unike që platforma ka pasur ndonjëherë. Ajo u shpreh se është një nder që një pjesë e historisë së kinemasë dhe kulturës të prezantohet përmes tyre.
Filmi bazohet në romanin klasik gotik “Wuthering Heights” të autores Emily Brontë, botuar për herë të parë në vitin 1847. Historia rrëfen dashurinë e trazuar dhe pasionante mes Catherine Earnshaw dhe Heathcliff, një nga historitë më të njohura romantike në letërsinë angleze.
Me këtë çmim dhe me historinë që mbart, karroca pritet të tërheqë interesin e koleksionistëve dhe adhuruesve të filmit në mbarë botën.
