Ministri i Brendshëm serb, Ivica Daçiq, është shtruar në Klinikën e Pulmonologjisë të Qendrës Klinike të Serbisë për shkak të pneumonisë së rëndë dhe sipas raportimeve po lufton për jetën.
Pulmologu Spasoje Popeviq tha se gjendje e Daçiqit, është shumë e rëndë dhe se ai është në njësinë e kujdesit intensiv në ventilim mekanik, pra në ventilator.
Me një njoftim për gjendjen shëndetësore të tij ka dalë edhe partia të cilën ai e udhëheq, SPS.
“Pavarësisht shëndetit të tij të dëmtuar rëndë, ne besojmë në forcën e Ivica Daçiqit, i cili deri më tani i është përgjigjur me triumf të gjitha sfidave dhe tundimeve të jetës, dhe lutemi për një fitore tjetër për të. Shprehim mirënjohjen tonë të pafundme për mjekët dhe stafin mjekësor të Qendrës Klinike të Serbisë dhe Klinikës për Pulmonologji, të cilët po bëjnë përpjekje të mëdha në këtë betejë të vështirë”, thuhet në njoftimin për shtyp të SPS-së.
