Interi mbyll dyert për rikthimin e Mauro Icardit, Marotta zbulon planet e klubit

Presidenti i Interit, Giuseppe Marotta, ka hedhur poshtë mundësinë e rikthimit të sulmuesit argjentinas Mauro Icardi në “San Siro”, pavarësisht dëshirës së këtij të fundit për t’u ribashkuar me ish-klubin e tij.

Sulmuesi 33-vjeçar është aktualisht lojtar i lirë, pas përfundimit të aventurës me Galatasarayn në fund të sezonit të kaluar. Icardi, i cili për shumë vite ishte një prej figurave kryesore dhe kapiten i Interit, nuk e ka fshehur dëshirën për t’u rikthyer në futbollin italian.

Megjithatë, një rikthim i tillë duket i pamundur, pasi drejtuesit zikaltër nuk e konsiderojnë argjentinasin pjesë të planeve të tyre për të ardhmen.

Marotta ka bërë të qartë se Interi nuk ka ndërmend të investojë për një sulmues të ri, duke vlerësuar se reparti ofensiv është i kompletuar me futbollistët që ka aktualisht në dispozicion.

Ai ka theksuar se klubi ka katër sulmues në skuadër dhe se mungesat e njëkohshme të disa prej tyre kanë qenë thjesht pasojë e rrethanave, pa krijuar nevojën për ndërhyrje në afatin kalimtar.

Sipas presidentit zikaltër, edhe puna e trajnerit Cristian Chivu në organizimin e repartit ofensiv ka qenë pozitive, pasi skuadra ka treguar efikasitet të mirë para portës.

Marotta ka vënë në pah se Interi renditet ndër skuadrat më produktive në Serie A, duke u pozicionuar pas Romës sa i përket numrit të golave të shënuar. Ai ka pranuar se në arenën evropiane shifrat janë disi më të ulëta, por këtë e ka lidhur edhe me nivelin e lartë të kundërshtarëve me të cilët përballen zikaltërit.

Në vlerësimin e tij, Chivu ka dëshmuar se është një trajner modern, i aftë të nxjerrë maksimumin nga lojtarët që ka në dispozicion dhe të ndërtojë një sistem loje që krijon mundësi të shumta për shënim.

Kështu, pavarësisht dëshirës së Icardit për t’u rikthyer në klubin ku kaloi vitet më të rëndësishme të karrierës, Interi duket se e ka përjashtuar këtë mundësi, duke vazhduar të besojë te alternativa aktuale në sulm.