Kryetari i PDK’së, Bedri Hamza, ka dhënë detaje rreth takimit të djeshëm me Kryeministrin Albin Kurti, lidhur me çështjen e presidentit, për zgjedhjen e të cilit kanë mbetur më pak se dy javë kohë.
Hamza tha se nuk ka shkuar në takim për pazare politike e as për ndonjë marrëveshje.
Ai tha se në takim nuk ështtë përmendur asnjë emër për postin e Presidentin.
“ Unë dje nuk kam shkuar që të bëj marrëveshje politike për të kërkuar që ne të kemi hise apo të përfitojmë diçka politikisht apo të bëjmë ndonjë pazar politik… Në takim nuk ka pas prezantim të ndonjë emri. Asnjë emër nuk është përmend”, ka deklaruar Hamza.
Ai tha se me Kurtin kanë diskutuar për tema të ndryshme, teksa për çështjen e Presidentit tha se qëndrimi i PDK’së mbetet i njëjtë.
“Kemi diskutuar për parimet, për rregulla,. Unë i kam dhënë qëndrimet e PDK’së, të cilat po i përsërit përveçse ndonjë kandidat i cili i plotëson kriteret që i ka vendosë PDK e këto janë që ta paraqes unitetin, e të jetë përfaqësues i gjithë spektrit politik, jo prej ndonjë partie politike, atëherë ne ulemi dhe e shqyrtojmë atë kandidaturë, edhe në Kryesi edhe në Grup Parlamentar”, ka thënë Hamza në RTV Dukagjini.
Kurti ndërkohë ka paralajmëruar intensifikim të bisedimeve për të gjetur zgjidhje për çështjen e Presidentit.
Për zgjedhjen e presidentit të ri, kanë mbetur kohë më pak se dy javë, teksa Kurti disa herë theksoi se do të jetë çështje e vështirë sigurimi i numrave, duke theksuar se 66 votat që i kanë, janë larg 80’shit, sa nevojiten për zgjedhjen e presidentit.
Ai tha se zgjidhja është tek tri partitë e para, Vetëvendosja, PDK dhe LDK, teksa qartësoi se presidentja aktuale, Vjosa Osmani, e cila po synon edhe një mandat, nuk është kandidatja e tij për president.
Sipas Kushtetutës, në dy raundet e para për zgjedhjen e presidentit kërkohen 80 vota nga 120 deputetë, ndërsa në raundin e tretë mjaftojnë 61 vota. Një kandidat duhet të sigurojë fillimisht të paktën 30 nënshkrime për të hyrë në garë.
