Regjisori dhe aktori i njohur Rob Reiner dhe bashkëshortja e tij, Michele Singer Reiner, u gjetën të vdekur në shtëpinë e tyre në Brentwood të dielën pasdite.
Autoritetet amerikane po e hetojnë ngjarjen si një homicid të dyshuar, ndërsa hetimet janë ende në zhvillim.
Sipas policisë, ekipet e emergjencës u thirrën fillimisht për një rast mjekësor, por në vendngjarje u konstatuan plagë që dyshohet se janë shkaktuar nga armë e ftohtë. Ende nuk ka arrestime dhe shkaku zyrtar i vdekjes pritet të konfirmohet nga mjekësia ligjore. Burime mediatike raportojnë se një anëtar i familjes është marrë në pyetje, pa akuza zyrtare deri tani.
Rob Reiner ishte një figurë ikonë e filmit dhe televizionit amerikan, i njohur për role dhe filma të famshëm si “All in the Family”, “The Princess Bride”, “When Harry Met Sally…” dhe “A Few Good Men”. Michele Singer Reiner ishte një fotografe e respektuar dhe bashkëshortja e tij prej më shumë se tre dekadash.
Vdekja e çiftit ka tronditur industrinë e argëtimit, duke nxitur reagime dhe homazhe të shumta nga kolegë, figura publike dhe fansa, ndërsa autoritetet vazhdojnë hetimet për të zbardhur plotësisht rrethanat e ngjarjes.
