Këtë të premte, në DokuKino të Kino Lumbardhit në Prizren, do të shfaqet filmi i tretë dhe përmbyllës i programit “Trilogjia e Proletariatit”, duke finalizuar ciklin e nëntorit.
Filmi rrëfen udhëtimin e një njeriu që përpiqet t’i largohet një sistemi të rrënuar, duke bartur vetëm borxhet, lodhjen dhe një ide të turbullt për lirinë. Gjatë rrugës ai takon njerëz të tjerë të zhgënjyer nga premtimet e progresit, të cilët mbështeten te humori dhe dashuria për të ruajtur shpresën.
Rrugëtimi i tij kthehet në një portret të zhgënjimit kolektiv, por edhe të qëndresës njerëzore. Mes varfërisë dhe absurditetit, mbetet i gjallë një impuls i vogël utopik – një besim se jeta mund të marrë një drejtim tjetër.
Shfaqja është pjesë e programit filmik të Lumbardhit, që vazhdon të sjellë reflektime të thella mbi realitetet shoqërore bashkëkohore.
