Lirimin e tre policëve të Kosovës të rrëmbyer nga forcat serbe, e ka kërkuar edhe kryeministri i Shqipërisë, Edi Rama.
Në një konferencë të përbashkët me kryeministrin hungarez, Victor Orban, i cili vizitoi Tiranën, Rama tha se mbajtja e tyre është e paarsyeshme.
“Duhet të kthehen në shtëpitë e tyre se s’kanë bërë asnjë krim edhe sikur ta presupozojmë që janë kapur disa qindra metra në anën tjetër, apo në këtë anë, njëra palë thotë kështu, njëra palë ashtu, pala e tretë që merret me këtë punë thotë edhe kështu edhe ashtu, nuk ka asnjë vlerë kjo në raport me ata. Shkelje kufiri do të thotë kthehu prapa. Kaq!”, tha Rama.
Madje, sipas Ramës, zgjidhja për çështjet mes Kosovës e Serbisë dihet.
“Dokumenti i marrëveshjes është në tryezë. Dhe mundësia historike është në tryezë, për të mbyllur një kapitull shumë të gjatë dhe të dhimbshëm dhe për të hapur një kapitull të ri dhe për ta bërë Kosovën një vend të njohur ndërkombëtarisht, jo vetëm nga ata që e njohin deri sot, por nga të gjithë, edhe nga Serbia”, tha Rama.
Situatën e komentoi shkurt edhe kryeministri i Hungarisë, Viktor Orban.
“Javën e ardhshme do ta kemi një takim bilateral me Serbinë, pra hungarez dhe serbë dhe shpresoj që deri atëherë, kjo çështje do të zgjidhet”, tha Orban.
Ndërkohë, tre policëve iu është shqiptuar masa e paraburgimit nga Gjykata e Lartë në Kralevë. /atvlive.tv
Edicionin Qendror të lajmeve në ATV e gjeni në videon më poshtë:
