Përgatiti: Arton Hamiti
Vetëm disa metra nga qendra e qytetit, këtë pamje ka lumi Graçanka që rrjedh përgjatë Komunës së Graçanicës.
Në fakt lumi, sipas organizatës mjedisore “Rilindja gjelbër” është lumi me cilësinë më të dobët të ujit, nga 10 sosh, sa janë monitoruar gjatë dy vjetëve të fundit.
“Janë monitoruar zona nga komuniteti, pra janë 10 pika të cilat janë sinjalizuar nga komuniteti për ndotje të ujërave. Me anë të analizimit të këtyre ujërave, ne kemi ardhur në përfundim se i takojnë statusit të moderuar që nënkupton i takojnë klasifikimit më të fundit të ujërave sipërfaqësorë, që i bën të jenë të cilësisë së dobët ose gjendje të mjerueshme që janë lumenjtë tanë”, tha Dijesa Morina nga “Rilindja gjelbër”.
Në cilësinë e dobët të ujit, kontribut të madh llogaritet të këtë njeriu.
Megjithatë, vlerësohet se as institucionet përkatëse nuk arrijnë ta menaxhojnë
ndotjen e lumenjve.
“Shkarkimet urbane, nënkuptohet se vijnë si pasojë e aktiviteteve njerëzore dhe industritë e të gjitha këto, por pastaj nuk është faji tek aktiviteti njerëzor në njëfarë mënyre, por kalon te pjesa e menaxhimit të cilësisë së ujërave nga pjesa lokale dhe qendrore pasi që duhet të ketë impiante të ujërave të zeza. E gjithë pjesa tjetër e fajit kalon tek operatorët privatë, të cilët merren me industri të ndryshme dhe të gjitha ujërat si ato që përdoren si lëndë të parë si ato që janë ujëra të zeza shkarkohen në lumenj”, tha Morina.
Ndotja vjen edhe nga hedhja e pakontrolluar e mbeturinave në lumenj, përdorimit të pesticideve dhe plehrave kimike në bujqësi, dëmtimit të shtretërve të lumenjve nga shfrytëzimi i inerteve, si dhe nga ndërtimet ilegale.
Sipas raportit për cilësinë e ujërave sipërfaqësore, cilësi të dobët të ujit kanë edhe lumi Sitnica, Ibri, Lumëbardhi i Prizrenit dhe lumi Nerodime.
