Bayern Munich mohon interesimin për Dani Olmon dhe Jules Koundé në merkaton e janarit

Bayern Munich nuk po përgatit, të paktën për momentin, asnjë lëvizje për transferimin e Dani Olmos apo Jules Koundé nga Barcelona në merkaton e dimrit.

Lajmi është bërë i ditur nga Christian Falk, gazetari i njohur për informacionet rreth klubit gjerman, i cili ka përgënjeshtruar raportimet për një ofensivë të mundshme të kampionëve të Bundesligës për dy futbollistët katalanas.

Sipas Falk, përgjegjës për mbulimin e lajmeve të Bayern Munichut në grupin mediatik “BILD”, aktualisht nuk ka negociata dhe as plane për konkretizimin e ndonjërit prej këtyre dy operacioneve gjatë muajit janar.

Megjithatë, interesi i bavarezëve për lojtarët e Barcelonës nuk është i ri. Në fillim të tetorit, gazeta spanjolle “Mundo Deportivo” raportoi se Bayern Munich po e ndiqte nga afër Dani Olmon. Më herët, “Sky Sports” kishte bërë të ditur se klubi gjerman mund të ofronte deri në 90 milionë euro për mesfushorin spanjoll.

Pavarësisht këtyre raportimeve, Falk mohon se Bayerni po përgatit aktualisht një ofertë për Olmon, i cili është lindur në Terrassa të Spanjës.

Megjithatë, gazetari thekson se mesfushori mund të mbetet një alternativë tërheqëse për klubin gjerman në planin afatgjatë, ndërsa vëzhgimi i tij nga drejtuesit bavarezë pritet të vazhdojë.

Për momentin, Bayern Munich nuk ka ndërmend të ndërmarrë hapa konkretë për transferimin e Olmos apo Koundé në merkaton e janarit.