Zëdhënësi i Policisë së Kosovës, Baki Kleni, në një konferencë të jashtëzakonshme, tha para gazetarëve se janë kidnapuar tre zyrtarë kufitar patrullues brenda territorit të Kosovës, transmeton atvlive.tv.
Deklarimin e policisë serbe se arrestimi ka ndodhur në territorin e Serbisë, Kelani e quajti të rrejshëm.
“Ata janë zyrtarë kufitar patrullues dhe nuk janë zyrtarë të njësiteve speciale. Është një deklarim i rrejshëm i palës serbe. Sa i përket arritjes në vendin e ngjarjes, mund të them që njësiti i cili ka qenë në përbërje prej tre zyrtarëve, ka parë persona të dyshuar në formën siç e thash të armatosur dhe të maskuar dhe menjëherë ka dhënë informacione për njësitë shtesë. Njësitet shtesë kanë shku menjëherë, sa më parë që kanë mundur të arrijnë në atë lokacion sepse ju e dini që rrethanat në brezin kufitar e vështirësojnë pak a shumë lëvizje të shpejta, kanë mbërri në atë lokacion dhe kur kanë mbërri kanë gjetë vetëm veturën zyrtare dhe jo zyrtarët policorë. Sa i përket çështjes se ata deklarojnë se janë në territorin e Serbisë dhe kanë marrë persona siç ata quajnë kriminel dhe jo zyrtarë policorë, dua të ju siguroj se ata janë tre zyrtarë policorë të moshës së shtyer rreth 50-vjeçarë, apo edhe mbi 50-vjeçarë, të cilët kanë shërby për vite më radhë në Policinë e Kosovës”, tha Kelani.
Ai tregoi se kanë dërguar njesitet e Policisë së Kosovës në vendin ku janë kidnapuar tre zyrtarët policor të Kosovës si dhe kanë njoftuar mekanizmat ndërkombëtarë, duke përfshirë edhe KFOR-in.
“Vendi i ndalimit ka qenë në territorin e Kosovës dhe për këtë arsye ne kemi dërgu njësitë tona, kemi ftuar mekanizmat ndërkombëtarë përfshirë edhe KFOR-in që është përgjegjës për zonën kufitare që të jetë në atë pjesë dhe t’i kryejmë të gjitha detyrat bashkërisht”, tha Kelani. /atvlive.tv
Konferencën e jashtëzakonshme të Policisë së Kosovës e gjeni në videon më poshtë:
