Presidenti i SHBA-së, Donald Trump, shpalli një “fitore të plotë dhe totale” për Shtetet e Bashkuara, pasi ra dakord për një armëpushim dyjavor me Irani . Në një intervistë të shkurtër telefonike me AFP të martën, kur u pyet nëse e konsideronte armëpushimin një fitore, Trump u përgjigj: “Një fitore e plotë dhe totale. Njëqind për qind. Pa dyshim.”
Trump njoftoi gjithashtu në rrjetin e tij social Truth Social. Ai lëshoi një mesazh optimist për Lindjen e Mesme, duke pretenduar se një “epokë e artë” ishte në horizont për rajonin. Sipas tij, Irani është gati për paqe dhe SHBA-të do të ndihmojnë në zgjidhjen e bllokimeve të trafikut përmes Ngushticës së Hormuzit.
“Një ditë e madhe për paqen botërore! Irani e dëshiron, i ka ardhur në majë të hundës! Dhe kështu bëjnë edhe të gjithë të tjerët! Shtetet e Bashkuara do të ndihmojnë me trafikun në Ngushticën e Hormuzit. Do të ketë shumë veprime pozitive! Do të ketë shumë para për të fituar. Irani mund të fillojë rindërtimin. Ne do të pajisemi me të gjitha furnizimet që mundemi dhe thjesht do të qëndrojmë pranë për t’u siguruar që gjithçka të shkojë mirë. Jam i sigurt se do të shkojë mirë. Ashtu si ajo që po ndodh këtu në SHBA, kjo mund të jetë epoka e artë e Lindjes së Mesme!!!”
Kujtojmë, Presidenti i SHBA-së, Donald Trump, njoftoi se ishte dakord për një pezullim dyjavor të sulmeve ndaj Iranit, me kusht që Teherani të hapte menjëherë dhe plotësisht Ngushticën e Hormuzit, thelbësore për furnizimet globale me naftë. Irani dhe Izraeli më pas konfirmuan se pranonin një armëpushim të përkohshëm, dhe ushtria amerikane ndaloi sulmet, ndërsa Shtëpia e Bardhë thekson se kjo është baza për negociata të mëtejshme.
