Kryetari i Prishtinës, Përparim Rama, ka bërë të ditur se Plani i ardhshëm Zhvillimor Komunal pritet të dalë në konsultim publik brenda muajit të ardhshëm, duke synuar përfshirje të gjerë të qytetarëve dhe transparencë institucionale.
Këto komente ai i bëri pas një takimi me Zëvendëskomandantin e KFOR, Gjeneral Brigade Federico Collina, ku u diskutuan çështje që lidhen me zhvillimin dhe sigurinë në kryeqytet.
“Gjatë takimit prezantova edhe Planin e ardhshëm Zhvillimor Komunal, i cili pritet të dalë për konsultim publik brenda muajit të ardhshëm, me synimin për të siguruar pjesëmarrje të gjerë të qytetarëve dhe transparencë të plotë institucionale”, ka deklaruar Rama.
Ai ka theksuar se ky dokument strategjik do të shërbejë si udhërrëfyes për zhvillimin e qëndrueshëm të Prishtinës në vitet në vijim.
“Ky dokument strategjik do të shërbejë si udhërrëfyes për zhvillimin e qëndrueshëm të komunës sonë në vitet në vijim”, është shprehur ai.
Sipas Ramës, diskutimi me përfaqësuesit e KFOR-it ka konfirmuar rëndësinë e komunikimit dhe koordinimit të vazhdueshëm ndërmjet institucioneve për çështje që ndikojnë drejtpërdrejt në zhvillimin e qytetit dhe mirëqenien e qytetarëve.
“Prishtina mbetet e përkushtuar në forcimin e institucioneve, përmirësimin e planifikimit urban dhe krijimin e kushteve për një të ardhme më të sigurt, më të organizuar dhe më të qëndrueshme për të gjithë qytetarët e saj”, ka shtuar Rama.
