Qytetarët që qarkullojnë sot në lagjen “Dardania” duhet të përgatiten për ndryshime në trafik.
Komuna e Prishtinës ka njoftuar se gjysma e tunelit, nga segmenti që shpie drejt shkollës “Xhemajl Mustafa” deri te hyrja e tunelit, do të jetë e mbyllur përkohësisht gjatë ditës së sotme.
Sipas njoftimit, mbyllja bëhet për shkak të aktiviteteve kulturore që do të zhvillohen në këtë hapësirë nga “Kultura House”, të cilat pritet të sjellin një atmosferë festive sonte në Dardani.
“Për nevoja teknike dhe për sigurinë e qytetarëve, do të mbyllet përkohësisht gjysma e tunelit/rrugës, nga segmenti që shpie drejt shkollës ‘Xhemajl Mustafa’ deri te hyrja e tunelit, duke filluar nga ora 08:00 e mëngjesit deri pas përfundimit të aktivitetit dhe pastrimit të hapësirës publike. Pjesa tjetër mbetet e lirë për qarkullim. Aktivitetet kulturore do të nisin nga ora 20:00, me performanca muzikore dhe artistike duke sjellë një atmosferë festive në Dardani”, thuhet në njoftimin e Komunës së Prishtinës.
Banorët e zonës dhe qytetarët që kalojnë përmes Dardanisë këshillohen të planifikojnë me kujdes lëvizjet gjatë ditës për të shmangur vonesat.
