Përgatiti: Nora Luta
Në shkurt të vitit të ardhshëm bëhen plot 9 vjet prej kur punimet e Kuvendit të Kosovës ishin ndërprerë për shkak të hedhjes së gazit lotsjellës.
Nga ajo periudhë ndaj shumë deputetëve u ngritën aktakuza, por shumica e rasteve janë ende në shqyrtim nga gjykata e shkallës së parë.
Asaj të Prishtinës, e cila i liroi nga akuzat, iu rikthye në punë nga instanca e dytë rasti ndaj Albulena Haxhiut, Pal Lekajt, Donika Kadaj – Bujupit dhe Besa Baftiut.
Por, shqyrtimi fillestar dështoi të mbahet në mungesë të të pandehurve.
Me pak minuta vonesë, por u paraqit në sallën e gjykimit vetëm Albulena Haxhiu, që udhëheq aktualisht dikasterin e drejtësisë.
Pasi konstatoi mungesën e Lekajt, Bujupit e Baftiut, kryetarja e trupit gjykues caktoi për në shkurt seancën e radhës, e Haxhiut ia rikujtoi një obligim.
Në vitin 2026 bëhen 10 vjet nga koha kur, sipas Prokurorisë, është kryer vepra penale, e sipas avokatëve nëse rasti zvarritet, rrezikon parashkrimin.
Aktakuza, e cila u ngrit në prill të 2016-s, thotë se katër të pandehurit pa autorizim kishin poseduar dhe kishin hedhur bombola të gazit lotsjellës, duke penguar punën e Kuvendit të Kosovës, në shkurt të po të njëjtit vit.
