Vrasje në Shkodër, 33-vjeçari u qëllua me breshëri plumbash

Policia e Shkodrës ka publikuar detajet e para mbi krimin e regjistruar mëngjesin e së dielës, ku një 33-vjeçar u gjet i ekzekutuar me armë zjarri në fshatin Dragoç.

Sipas bluve të Shkodrës, autorët kanë qëlluar me armë drejt makinës me të cilën po qarkullonte i riu dhe për pasojë ka humbur jetën në vend.

Njoftimi i policisë:

Rreth orës 07:15, në fshatin Dragoç, në rrugë, është qëlluar me armë zjarri në drejtim të automjetit tip Benz, me drejtues shtetasin Ramazan Mataj, 33 vjeç, banues në Dragoç, Shkodër, i cili ka humbur jetën.

Në vendngjarje kanë shkuar shërbime të shumta të Policisë dhe Forca Kombëtare e Sigurisë, Njësia Shkodër.

Sipas policisë, është ngritur një grup i posaçëm hetimor dhe në drejtimin e Prokurorisë vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të rastit, identifikimin dhe kapjen e autorëve.