Ministri i Shëndetësisë, Arben Vitia, ka thënë se rasti i vdekjes së 35 vjeçares në Malishevë nuk do të kalojë në heshtje. Ai ka thënë se ndaj përgjegjësve do të ketë masa.
Vitia ka shkruar se “ky rast tragjik shënon një moment vendimtar për ndalimin e pandëshkueshmërisë dhe papërgjegjshmërisë në praktikat e licencimit”.
Ai ka thënë se në rast të evidentimit të shkeljeve penale, ato do të procedohen menjëherë në organet e drejtësisë.
“Kam kërkuar me gjithë fuqinë që më jep ligji që të kontrollohet çdo hap e veprim i komisionit vlerësues që i paraprinë licencimit. Dhe çdo procedurë. Ndaj përgjegjësve, do të ketë masa”, ka shkruar ai.
Ndërsa Policia e Kosovës ka njoftuar se ka arrestuar dy punonjës shëndetësorë në Komunën e Malishevës për trajtim të pandërgjegjshëm mjekësor, pas vdekjes së një gruaje të martën.
