Lëvizja Vetëvendosje e ka cilësuar Sami Lushtakun si njeriun që “pretendon se e udhëheq PDK-në, e mban të lidhur” dhe e kontrollon.
Në një komunikatë për media të lëshuar nga Gratë e Vetëvendosjes, thuhet se kryetari i Skenderajt e ka dëmtuar hapur subjektin që përfaqëson me fjalorin e tij të ashpër ndaj grave.
Sipas Vetëvendosjes, Lushtaku e ka humbur argumentin dhe i ka mbetur vetëm “gjuha e dhunës”.
“Kur Sami Lushtaku del e flet për ‘kudra që duhen lidhur’, nuk ka nevojë për shpjegime shtesë. Ai vetëm tregon se sa lehtë e sheh nënçmimin e qytetarëve dhe sa natyrshëm i vjen t’i trajtojë njerëzit si objekte për t’u urdhëruar e disiplinuar sipas humorit të tij”, tha Vetëvendosje.
“Ajo që thotë Lushtaku lidhet drejtpërdrejt me praktikën e tij kontrolluese, por edhe me bindjen se gratë janë të manipulueshme, të drejtuara nga dikush tjetër dhe të ofendueshme sipas nevojës së retorikës së tij. Ironia e zezë është se për të, gratë janë objekt i thjeshtë nënçmimi, ndërkohë që prania e tij në politikë është një ofendim për demokracinë: regres, turp dhe dëmtim i hapur për subjektin që pretendon se e udhëheq, e mban të lidhur dhe e kontrollon njeri për njeri”, thuhet në komunikatë.
LVV tha se deklarata të tilla dëmtojnë “vetëm autorin e tyre”.
“Në vitin 2025, këto britma nuk janë shenjë force, por dëshmi e panikut që po e mbyll kapitullin politik”, sipas komunikatës së LVV-së.
