Gjykata e Assizes e Brukselit dënoi me burgim të përjetshëm të mërkurën në mbrëmje tre autorët e vrasjes së veprimtarit të shquar shqiptar, Enver Hadrit.
Të martën, Veselin Vukotic dhe Andrija Draskovic u shpallën fajtorë për ekzekutimin e krimit dhe Bozhidar Spacic u shpall fajtor për urdhërimin e tij, raporton The Brussels Times, përcjell Insajderi.
Enver Hadri, kryetar i Komitetit për Mbrojtjen e të Drejtave të Njeriut në Kosovë, u vra në veturën e tij ndërsa ishte ndalur në semaforin e kuq në Saint-Gilles më 25 shkurt 1990.
Gjyqtarët profesionistë dhe të dymbëdhjetë juristët nuk kanë dhënë asnjë rrethanë lehtësuese për tre të dënuarit, duke i dënuar të gjithë me burgim të përjetshëm, dënimin maksimal.
Më 25 shkurt 1990, rreth orës 16:00, Enver Hadri ishte në veturën e tij, ndaloi në semafor të kuq, kur pranë tij u ndal një automjet tjetër.
Dritarja e pasagjerit të këtij automjeti ishte qëlluar, sipas disa dëshmitarëve. Enver Hadri, 49 vjeç atëbotë, u godit nga një plumb në kokë dhe vdiq.
Hetimi, i cili zgjati disa vite, arriti në përfundimin se ishte një atentat politik, i urdhëruar nga shërbimet inteligjente të ish-Jugosllavisë, me ndihmën logjistike të botës së krimit të Beogradit.
