Përgatiti: Kastriot Tahiri
Mjegulla dhe ngricat e mëngjesit të së hënës, dyshohet të jenë shkaktarët e aksidentit zinxhiror, mes 14 veturave, në autostradën, “Ibrahim Rugova”, përkatësisht në aksin rrugor Mazgit – Bresje. Sipas Policisë, të lënduar mbetën tetë persona.
“Rreth orës 06:50, në autostradën Ibrahim Rugova, Mazgit-Bresje, sipas informatave fillestare, është shkaktuar një aksident zinxhiror trafiku, ku janë të përfshira 14 automjete dhe si pasojë e aksidentit është raportuar edhe për persona të lënduar, njësitet policore dhe ekipet emergjente kanë reaguar në vendin e ngjarjes për t’u marrë me rastin dhe trajtimin e personave të lënduar”, thuhet në njoftimin e Policisë së Kosovës.
Të lënduarit morën trajtim në Klinikën Emergjente të Qendrës Klinike Universitare të Kosovës.
“Tetë të lënduarit nga ky aksident, kanë ardhur për trajtim në Emergjencë. Të gjithë kanë pasur lëndime të lehta trupore, shtatë prej tyre janë lëshuar për në shtëpi, ndërsa njëri është duke i kryer disa fotografime në kabinetin e radiologjisë”, njoftoi drejtori i emergjencës në QKUK, Naser Syla.
Si pasojë e aksidentit, u bllokuan edhe dy hyrje në autostradë, ajo në fshatin Trude të komunës së Fushë-Kosovës, si dhe ajo në fshatin Mazgit të Obiliqit.
Njohësi i komunikacionit tregon edhe shkaqe të tjera që mund të kenë ndikuar në shkaktimin e aksidentit.
“Stabiliteti i automjetit, kthesa, gomat, janë disa shkaktarë. Neglizhimi i operatorit ekonomik, të cilët nuk po ndëshkohen nga ministria. Për këtë edhe kemi gjendjen qysh e kemi, me gjithë këta të lënduar. Nëse do ta mirëmbajnë rrugën sa ma serioz, të paktën shkaktarët e aksidenteve që vijnë nga rruga do të zvogëloheshin”, tha Bekim Ahmeti, njohës i komunikacionit.
Policia e Kosovës të hënën ka publikuar edhe një njoftim se si duhet të veprojnë shoferët gjatë motit me mjegull, duke iu bërë thirrje për vëmendje të shtuar gjatë ngasjes.
