Federata Mbretërore e Futbollit e Marokut ka reaguar zyrtarisht pas finales së Kupës së Kombeve të Afrikës ndaj Senegalit, duke bërë të ditur se ka nisur procedura ligjore për shkak të ngjarjeve që shënuan përfundimin e ndeshjes.
Përmes një komunikate për media, federata marokene ka theksuar se synon të kërkojë “drejtësi” për atë që e cilëson si cenim të rrjedhës normale të finales, pavarësisht se gjatë ndeshjes kishte vlerësime të ndryshme lidhur me vendimet e gjyqtarit.
Kontesti lidhet me një moment kyç të takimit, kur gjyqtari akordoi një penallti për Marokun, vendim pas të cilit Kombëtarja e Senegalit reagoi duke u larguar përkohësisht nga fusha në shenjë proteste. Megjithatë, jo të gjithë lojtarët senegalezë e braktisën fushën dhe pas rreth dhjetë minutash ndërprerjeje, ndeshja u rifillua.
Në fund, Senegali arriti të triumfonte dhe të fitonte titullin e kampionit të Afrikës, por ngjarjet e fundit të finales vazhdojnë të shkaktojnë debate të forta në opinionin sportiv.
Federata Marokene ka njoftuar se do të ndjekë rrugë ligjore ndaj Konfederatës Afrikane të Futbollit (CAF) dhe FIFA-s, duke kërkuar shqyrtimin e situatës dhe mundësinë e anulimit të rezultatit ose riluajtjes së finales.
“Kjo situatë ndikoi drejtpërdrejt në zhvillimin normal të ndeshjes dhe në performancën e lojtarëve tanë. Vendimi i gjyqtarit për penalltinë ishte i drejtë, por reagimi që pasoi ndryshoi rrjedhën e finales”, thuhet në deklaratën e federatës marokene.
Në të njëjtën kohë, federata ka falënderuar tifozët për mbështetjen e vazhdueshme gjatë turneut dhe për atmosferën e krijuar gjatë organizimit të kampionatit.
Megjithatë, bazuar në praktikat e mëparshme të Kupës së Kombeve të Afrikës, një anulim i finales apo heqje e titullit konsiderohet shumë pak e mundshme. Në rast të ndonjë vendimi disiplinor, pritet që ai të jetë i natyrës financiare dhe jo sportive.
