Sulmet në veri, 30 ditë kohë Prokurorisë dhe Dalibor Spasiqit për arritjen e marrëveshjes për pranim të fajësisë

PËRGATITI: NORA LUTA

I akuzuar për sulm ndaj gazetarëve, dhe pjesëmarrje në protestat në Zveçan Dalibor Spasiq, ka kërkuar marrëveshje për pranim të fajësisë.

Spasiqit, i cili gjendet nën masën e dorëzanisë, Gjykata e Mitrovicës i ka dhënë kohë 30 ditë për arritjen e saj.

Deri më tani, Gjykata nuk ka pranuar ndonjë njoftim për arritjen e marrëveshjes apo për dështim të negociatave, ndonëse palëve iu është dhënë afati prej tridhjetë (30) ditësh.

Kërkesën për negocim të marrëveshjes, e ka paraqitur avokati i Spasiq, Sërxhan Mitrovic, i cili gjatë ditës nuk ka qenë i qasshëm për televizionin.

Sipas Prokurorisë së Mitrovicës, ai ishte kontaktuar para 17 dhjetorit kur ishte planifikuar nisja e shqyrtimit gjyqësor, por nuk ishte paraqitur për të filluar negociatatat.

Dalibor Spasiq ishte arrestuar më 17 qershor të vitit të kaluar, në Jarinjë, por ishte liruar një muaj më vonë./atvlive.tv