Spanja shpall tre ditë zie kombëtare pas aksidentit tragjik hekurudhor me 68 viktima

Spanja ka shpallur tri ditë zie kombëtare pas aksidentit tragjik hekurudhor që u mori jetën të paktën 68 personave, ndërsa dhjetëra të tjerë mbetën të plagosur. Tragjedia konsiderohet ndër aksidentet më të rënda hekurudhore në historinë moderne të Evropës.

Ekipet e emergjencës kanë punuar gjatë gjithë natës në vendin e ngjarjes, duke përdorur prozhektorë, dronë dhe helikopterë në kërkim të viktimave dhe për largimin e rrënojave. Sipas autoriteteve, disa prej viktimave ende nuk janë identifikuar.

Aksidenti ndodhi mëngjesin e 28 tetorit, kur një tren i kompanisë private Iryo, që udhëtonte nga Madridi drejt Seviljes, u përplas me një tren të kompanisë shtetërore Renfe. Si pasojë e përplasjes, disa vagonë dolën nga shinat dhe u rrëzuan poshtë një argjinature.

Sipas ministrit spanjoll të Transportit, Óscar Puente, treni i Iryo-s, i cili kishte 147 pasagjerë në bord, ishte ndalur në shina për shkak të një defekti kompjuterik. Ndërkohë, treni i Renfe-s transportonte 397 pasagjerë.

Autoritetet kanë nisur hetimet për të zbardhur shkaqet e aksidentit. Regjistrimet audio të komunikimeve mes kontrollorëve të trafikut hekurudhor dhe makinistëve duket se tregojnë se një treni me shpejtësi të lartë iu dha leja për të vazhduar lëvizjen, ndonëse një tren tjetër kishte mbetur i bllokuar në shina.

Kryeministri spanjoll, Pedro Sánchez, u shprehu ngushëllime familjeve të viktimave, duke deklaruar se “e gjithë Spanja është në zi”. Ai e cilësoi të papranueshme që vendi të përballej me dy aksidente të rënda hekurudhore brenda të njëjtit vit.

Pas tragjedisë, shumica e partive politike pezulluan fushatat për zgjedhjet e ardhshme. Ndërkohë, rreth 1,500 persona u mblodhën në Madrid për të protestuar dhe për të kërkuar përgjegjësi nga qeveria për gjendjen e infrastrukturës hekurudhore.

Policia ndërhyri për të shpërndarë turmën pasi disa protestues hodhën shishe dhe mjete ndezëse.

Edhe Bashkimi Evropian shprehu solidaritetin me Spanjën, duke ulur flamujt në gjysmë shtizë në Bruksel. Ndërkohë, sindikata spanjolle e makinistëve të trenave njoftoi se greva e planifikuar do të mbahet, me synimin për të kërkuar masa më të forta për garantimin e sigurisë hekurudhore.

Aksidenti ka rikthyer shqetësimet për sigurinë e transportit hekurudhor në Spanjë. Tragjedia e fundit hekurudhore me përmasa të ngjashme në vend ishte ajo e vitit 2013, pranë Santiago de Compostela-s, ku humbën jetën 80 persona.