Përgatiti: Arian Hajdaraj
Salla mezi i zuri 12 zyrtarët policorë e 2 doganierë që po akuzohen për marrje ryshfeti në pikën kufitare Qafë Prush, gjatë viti 2021. Që në nisje, avokatët mbrojtës deklaruan se nuk i kishin pranuar shkresat e lëndës.
Ndërsa të tjerë thanë se edhe në ato pak materiale të pranuara, nuk kishin qasje.
Pas deklarimit të Prokurorit se do kujdesen që t’ua sigurojnë materialet e nevojshme, gjykatësi mori vendim për shtyrjen e seancës për një muaj.
Zyrtarët policorë tashmë të suspenduar, Artan Thaqi, Agron Bejtullahu, Afrim Deda, Avdi Përolli, Benon Këpuska, Isa Ibrahimi, Kreshnik Arllati, Malë Berisha, Mehmet Manxhuka, Sami Hajdari, Shaqir Krasniqi dhe Uran Mati, si dhe dy doganierët Enis Turtulla dhe Senad Zherka, akuzohen se kryesisht përgjatë vitit 2021, në bashkëkryerje dhe me qëllim të përfitimit financiar, ua kanë mundësuar qytetarëve kalimin e pikës kufitare Qafë Prush, pa iu nënshtruar procedurave ligjore.
ATV, ka siguruar aktakuzën, ku shpjegohet se si e kanë mundësuar kalimin në këmbim të shumave të parave prej 10 deri në 50 euro.
“Me datë 15.10.2021 rreth orës 23:24, i akuzuari Artan Thaqi, në bashkëveprim me të akuzuarin Uran Mati, derisa ishin në detyrë në kabinë për kontrollin e pasaportave në pikë kalimin kufitar në qafë prush, me qëllim të mos veprojnë në pajtim me detyrën zyrtare, pranojnë shumën prej 10 euro nga dëshmitari ***** I cili udhëtonte me kolegët e tij me veturën xhip, i cili po transportonte mallra të ndryshme…”, thuhet në Aktakuzë.
Policët e doganierët, akuzohen po ashtu se kishin mundësuar kalimin e qytetarëve edhe pa testin për COVID-19.
“Më datë 18.10.2021 rreth orës 10:40, i akuzuari Artan Thaqi në bashkëveprim me të akuzuarit Shaqir Krasniqi dhe Uran Mati, der isa ishin në detyrë në kabinë për kontrollin e pasaportave në pikë kalimin kufitar në “qafë prush”, me qëllim që të mos veprojnë në pajtim me detyrën zyrtare , pranojnë ryshfet në shumë e papërcaktuar, nga qytetarët *****, me qëllim që të njëjtëve tu lejohet hyrja në territorin e republikës së Kosovës në mungesë të testit për covid”, thuhet më tej në Aktakuzë.
Këto ishin në fakt vetëm 2 nga 85 pikat e aktit akuzues, që u ngrit në muajin dhjetor.
