QKUK përballet sërish me mungesë të penjve kirurgjik

Jo vetëm së fundmi, por kohë pas kohe në klinikat e Qendrës Klinike Universitare të Kosovës (QKUK) është raportuar mungesë e penjve kirurgjikë.

Edhe gjatë ditëve të fundit është shfaqur sërish mungesa e këtij materiali, të domosdoshëm për ndërhyrjet kirurgjikale.

Lidhur me këtë çështje, nga QKUK-ja kanë konfirmuar për Indeksonline se tashmë është nënshkruar kontrata për furnizim me penj kirurgjik dhe se pritet që ato të dorëzohen gjatë ditës së sotme.

“Bazuar në të dhënat nga Barnatorja Qendrore, ju njoftojmë se Shërbimi Spitalor Klinik dhe Universitar i Kosovës ka nënshkruar kontratën për furnizim me penjë kirurgjik. Kanë përfunduar të gjitha procedurat e nevojshme administrative dhe gjatë ditës së sotme pritet liferimi”, thuhet në përgjigjen e QKUK-së për Indeksonline.