Prishtina triumfon në Vushtrri, merr tri pikë të rëndësishme dhe shkëputet në krye të tabelës

Prishtina ka marrë tri pikë të plota në udhëtim te Vushtrria, duke triumfuar me rezultat 1-2 në kuadër të javës së 13-të të Superligës së Kosovës.

Bardhekaltrit e nisën mirë takimin dhe kaluan në epërsi në minutën e 28-të, kur Rin Ahmeti realizoi pas një aksioni të bukur.

Prishtina e vazhdoi dominimin edhe në pjesën e dytë, ndërsa në minutën e 49-të Assane Diatta shënoi golin e dytë, duke e dyfishuar epërsinë e skuadrës mysafire.

Vushtrria arriti të ngushtonte rezultatin në minutën e 79-të, kur Urim Statovci përfitoi nga një gabim në mbrojtjen e Prishtinës dhe realizoi për 1-2.

Megjithatë, vendasit nuk arritën të shmangnin humbjen, ndërsa Prishtina u largua nga Vushtrria me pikët e plota.

Pas kësaj fitoreje, Prishtina ngjitet në kuotën e 32 pikëve, duke krijuar një epërsi prej pesë pikësh ndaj Malishevës, ndërsa Vushtrria mbetet me vetëm tri pikë.