PËRGATITI: ARTON HAMITI
Presidentja Vjosa Osmani nuk do ta nënshkruajë ligjin për Pagën Minimale deri në shpalljen e vendimit të Gjykatës Kushtetuese për këtë çështje. Mirëpo kjo nuk i ka zbutur qëndrimet e veteranëve të cilët janë të vendosur ta pengojnë punën e Kuvendit dhe të protestojnë. Ndërkohë konfirmuan se nuk ka ndonjë iniciativë të Qeverisë për të dialoguar.
Pasi Ligji për Pagën Minimale përfundoi në Gjykatë Kushtetuese, dekretimi i tij duket se do të marrë kohë. Nënshkrimi i ligjit nuk do të behet nga Presidentja Vjosa Osmani, derisa Kushtetuesja të marrë një vendim.
“Gjykata Kushtetuese e ka njoftuar Presidenten Osmani se grupi parlamentar i AAK-së dhe dy deputetë të tjerë kanë kërkuar shqyrtimin e kushtetutshmërisë së Ligjit për Pagën Minimale. Rrjedhimisht, Presidentja Osmani nuk do ta nënshkruajë këtë ligj, përpara se të kryhet shqyrtimi në Kushtetuese.”
Pavarësisht kësaj, qëndrimet e Veteranëve të UÇK-së, nuk janë zbutur.
“Ideja e Presidentes që mos ta dekretojë ligjin deri në një vendim të Gjykatës Kushtetuese, nuk na i zbutë qëndrimet tona. Ne do të dalim të protestojmë sepse është vendim i kryesisë se nëse Kuvendi provon të mblidhet ne do të dalim për t’i penguar mbajtjen e seancave”
Protestën e paralajmëruar me 26 korrik e ka komentuar edhe kryeministri Albin Kurti i cili tha se zgjidhja mund të gjindet por duhet bashkëbisedim.
“Në veçanti unë ju bëjë thirrje të gjithëve që këto t’i zgjedhim me gjuhën e fakteve dhe të dialogut, jo me kërcënime apo me sulme jashtë kuvendit apo brenda tij. Nuk ka një Qeveri e Republikës se Kosovës, e cila nuk ka shfaqur gatishmërinë, vullnetin, interesimin, për njohjen e mirënjohjen për falënderimin e pafundmë nga kategoritë e dala nga lufta, por duke mos e braktisur të vërtetën. Duke mos partizuar e politizuar”
Megjithatë, nga Organizata e Veteraneve, konfirmojnë se nuk ka ndonjë iniciativë nga Qeveria për dialog.
“Komunikimi i Shoqatave të dala nga lufta me Qeverinë e Kosovës, përkatësisht me kryeministrin Kurti ka ndodhë vitin e kaluar, në qershor të vitit të kaluar. Prej atëherë nuk kemi pasur komunikim, edhe pse kemi paralajmëruar protestë nuk kemi ndonjë kontakt me Zyrën e Kryeministrit apo nuk kemi ndonjë tentativë që të na kontaktojnë e të bisedojmë për shqetësimet dhe brengat tona.”
Pas një seance, ku paraprakisht pati edhe dhunë fizike, në një tjetër të jashtëzakonshme me 60 vota për e një abstenim u miratua Ligji për pagën minimale në lexim te dytë. Veteranet u lanë jashtë ligjit, çka edhe nxiti reagimin e tyre.
