Peshku shitet në ankand për çmim rekord 3.2 milionë dollarë

Një peshk ton i kaltër gjigant me peshë 243 kilogramë u shit për një çmim rekord prej 510 milionë jenë (3.2 milionë dollarë) në ankandin e parë të vitit 2026 në tregun e peshkut “Toyosu” në Tokio, raporton agjencia “AP”.

Ofertuesi më i lartë për këtë peshk në ankandin e mbajtur para agimit të hënën ishte kompania Kiyomura Corp., pronari i së cilës, Kiyoshi Kimura, drejton zinxhirin e njohur të restoranteve Sushi Zanmai.

Kimura, i cili e ka fituar ankandin vjetor shumë herë edhe më parë, theu rekordin e mëparshëm prej 334 milionë jenësh (2.1 milionë dollarë) që e kishte vendosur në vitin 2019, transmeton KOHA.net.

Kimura u tha më vonë gazetarëve se shpresonte ta blinte për një çmim pak më të ulët, por “çmimi u rrit para se ta kuptoje”.

Ankandi filloi me rënien e ziles dhe salla u mbush me peshq në formë torpedoje, me bishtat e prerë, në mënyrë që ofertuesit të mund të shqyrtonin detaje të mishit si ngjyra, tekstura dhe yndyrshmëria.

Peshku i shtrenjtë u kap në brigjet e Omas në Japoninë veriore, një rajon i konsideruar gjerësisht si prodhues i disa prej tonëve më të mirë në vend, dhe kushton 2.1 milionë jenë (13,360 dollarë) për kilogram.

“Është pjesërisht për fat të mirë”, tha Kimura. “Por kur shoh një ton që duket kaq mirë, nuk mund t’i rezistoj… ende nuk e kam shijuar, por patjetër që do të jetë i shijshëm”.

Qindra tonë shiten çdo ditë në ankandin e hershëm të mëngjesit, por çmimet janë dukshëm më të larta se zakonisht për tonin e Omas, veçanërisht në ankandin festiv të Vitit të Ri.

Për shkak të popullaritetit të tonit për sushi dhe sashimi, toni i kaltër i Paqësorit kishte qenë më parë një specie e kërcënuar për shkak të ndryshimeve klimatike dhe mbipeshkimit, por rezervat e tij po rimëkëmben pas përpjekjeve për ruajtje.