Përgatiti: Arian Hajdaraj
Përballë akuzave nga Prokuroria Speciale, gjasat janë që Hashim Thaçi të mbrohet pa avokatët Gregory Kehoe, Joe Reeder dhe pa anëtarët e shoqërisë së avokatëve Greenberg.
Juristët kanë paralajmëruar tërheqjen për shkak të mospagesave.
“Z. Thaçi nuk e ka përmbushur detyrimin ndaj Gregory Kehoe, Joe Reeder, Asociacionit Greenbuerg Legal dhe anëtarëve të ekipit mbështetës, andaj z. Thaçi i është dhënë një paralajmërim i arsyeshëm se do të kërkojnë përfundimin nëse nuk u është përmbushur detyrimi”, thotë njoftimi i Dhomave të Specializuara.
Mospagesa e avokatëve është konfirmuar edhe nga vetë familja e ish-presidentit, e cila i kishte angazhuar vetë.
”Në pamundësi për ta mbuluar koston për të gjithë avokatët e angazhuar deri në fund të vitit të kaluar, për shkak të vështirësive financiare jemi detyruar ta reduktojmë ekipin dhe tani avokat kryesor i z. Thaçi është z. Luka Mishetiq, i cili do të jetë në koordinim të plotë edhe me avokatët e tjerë ndihmës”, tha Idriz Thaçi, vëlla i Hashim Thaçit.
Pikërisht ndaj Luka Mishetiqit që është i angazhuar, sipas detyrës, Ministria e Drejtësisë thotë se i ka kryer të gjitha pagesat.
“Ministria e Drejtësisë realizon pagesa vetëm me avokatët me të cilët ka marrëveshje, në përputhje me legjislacionin në fuqi. Për më shumë, vetëm për vitin 2023, Ministria e Drejtësisë ka realizuar pagesa për mbrojtësit e z. Hashim Thaçi në shumën prej 1,371,800.00 Euro”, thuhet në reagimin e Ministrisë së Drejtësisë.
Sidoqoftë, njohës të fushës vlerësojnë se pa avokatët e sipërpërmendur, mbrojtja e ish-presidentit mund të jetë më e dobët.
Të mërkurën pas mbarimit të seancës, trupi gjykues ka planifikuar takim mes Hashim Thaçit dhe ekipit mbrojtës që ka kërkuar të tërhiqet për shkak të mospagesës.
