Përgatiti: Fatlum Jashari
Krahas falënderimeve për mbështetjen e vazhdueshme, në vizitën e saj zyrtare në Zagreb, presidentja Vjosa Osmani informoi në detaje krerët shtetërorë të Kroacisë për sulmin terrorist të 24 Shtatorit.
Pas takimit me homologun kroat, Zoran Milanoviç, presidentja tha se është e rëndësishme që partnerët ndërkombëtarë të ndëshkojnë Serbinë për aktin e agresionit ndaj Kosovës.
Edhe pse tha se nuk e di nëse Rusia ishte e përfshirë direkt në sulmin në Banjskë, presidenti Milanoviç shtoi se ajo që ndodhi i përshtatet asaj. Për përfshirjen e strukturave shtetërore serbe në sulm, ai tha se duhet kërkuar llogari nga presidenti Aleksandar Vucic.
“Dikush qëndron prapa kësaj dhe ne duhet ta dimë këtë, në mënyrë që të vazhdojmë të jetojmë normalisht… Uniformat mund të blihen online; sidoqoftë armët nuk mund të blihen në atë mënyrë. Nuk është IKEA, e as park zbavitjeje. Për të përgatitur diçka të tillë, duhet të kesh aprovimin e liderit suprem ose së paku njerëzve të afërt me të. Ka një numër pyetjesh logjike, të cilave Serbia duhet t’u japë përgjigje”, tha Milanoviç.
Pasi theksoi nevojën për rritjen e sigurisë kufitare, për shkak të pretendimeve territoriale të Serbisë, presidentja Osmani tha se Kosova mbetet e palëkundur në synimet e saj për anëtarësim në NATO dhe BE.
Krahas përsëritjes së thirrjes së përbashkët për njohjen e Kosovës nga shtetet që nuk e kanë bërë ende, presidentët Osmani dhe Milanoviç folën edhe për bashkëpunimin ndërmjet dy shteteve dhe rolin e ushtarëve kroatë në KFOR.
