Në Kosovë, Shqipëri dhe Maqedoni të Veriut, kanë hyrë në fuqi tri marrëveshjet që janë në kuadër të Procesit të Berlinit. Marrëveshja e parë vendosë lëvizjen e lirë të njerëzve vetëm me letërnjoftime dhe pa viza në Ballkanin Perëndimor, diçka që Kosova dhe Bosnje Hercegovina deri tani nuk kanë mundur ta aplikojnë.
Sipas Ministrisë së Jashtme në Maqedoninë e Veriut, marrëveshjet pritet të hyjnë në fuqi edhe në tri vendet e tjera nënshkruese, që përfshijnë Serbinë, Malin e Zi dhe Bosnje Hercegovinën.
Ministri Bujar Osmani, e ka quajtur këtë hap të rëndësishëm në përpjekjet për t’i afruar qytetarët.
“Maqedonia e Veriut është depozitues i këtyre marrëveshjeve të rëndësishme. Me kënaqësi dëshiroj të ju informoj se sot hyjnë në fuqi marrëveshjet për shtetet që i kanë përfunduar të gjitha procedurat e brendshme juridike si Republika e Shqipërisë, Republika e Kosovës dhe Republika e Maqedonisë së Veriut, ndërsa shumë shpejtë kjo pritet të ndodh edhe në Republikën e Serbisë, Malin e Zi dhe Bosnje e Hercegovinën”, ka thënë Osmani, përcjell KP.
Marrëveshjet të cilat janë nënshkruar në nëntor të vitit të kaluar përfshijnë lëvizjen e lirë të qytetarëve në Ballkanin Perëndimor me letërnjoftime, njohjen e kualifikimeve të arsimit të lartë dhe njohjen e kualifikimeve profesionale të mjekëve, stomatologëve dhe arkitektëve.
Muaj më parë, Kuvendi i Kosovës ka miratuar Projektligjin për ratifikimin e marrëveshjes për lëvizjen e lirë me letërnjoftime në Ballkanin Perëndimor.
Kjo ishte bërë me shumicë votash ku 82 deputetë votuan për këtë marrëveshje, asnjë kundër dhe asnjë abstenim.
Kryeministri i vendit, Albin Kurti kishte deklaruar se lëvizja e lirë e qytetarëve është diçka që është synuar tash e sa kohë nga Kosova.
