Pas një mungese katërmujore për shkak të një dëmtimi serioz të pësuar në ndeshjen ndaj Malishevës (0-0), futbollisti i Gjilanit, Oltion Bilalli, është rikthyer në stërvitje.
Në minutat e fundit të asaj ndeshjeje, 23 vjeçari u godit pa dashje me bërryl nga portieri Ilir Avdyli dhe më pas u përplas me kokë në tokë, duke pësuar një gjakderdhje të rëndë në kokë. Pas incidentit, ai u trajtua për disa javë në QKUK dhe qëndroi nën përkujdesje mjekësore derisa u lirua për rikuperim të mëtejshëm.
Rikthimi i tij në stërvitje është një sinjal i qartë për përmirësimin e ndjeshëm të gjendjes së tij shëndetësore. Ai ka filluar vrapimet dhe përgatitjet individuale, me synimin për t’iu bashkuar së shpejti pjesës tjetër të skuadrës.
“Pas katër muajsh të vështirë, plot sfida dhe sakrifica, jam rikthyer në fushë. Çdo ditë në rikuperim ka qenë një betejë më vete. Sot, më në fund jam aty ku i përkas – në fushë. Faleminderit të gjithëve që më qëndruan pranë,” ka shkruar Bilalli në një postim në rrjete sociale.
Rikthimi i tij pritet të jetë një përforcim i rëndësishëm për SC Gjilanin në vazhdim të sezonit, ndërsa klubi synon të arrijë objektivat e vendosur. /ATVLIVE.TV
