Mesditën e së dielës një 28-vjeçar nga Skenderaji është dërguar në Spitalin e Mitrovicës, por që ai ka rezultuar të jetë pa shenja jete. Zëdhënësi i Policisë për Rajonin e Mitrovicës, Avni Zahiti ka thënë se prokurori i rastit ka urdhëruar hetime për zbardhjen e rrethanave të rastit.
“Rreth 14:30 Policia ka pranuar informatën se në Spitalin Rajonal të Mitrovicës është sjellë pa shenja jete një 28-vjeçar nga Skenderaj. Hetuesit policorë me autorizim të prokurorit kanë nisur hetimet për zbardhjen e rrethanave të rastit”, ka njoftuar zëdhënësi i Policisë për Rajonin e Mitrovicës.
Zahiti po ashtu njoftoi se me urdhër të prokurorit trupi i pajetë është dërguar në Institutin e Mjekësisë Ligjore për obduksion, ndërkaq ende nuk janë publikuar informacionet për shkakun e vdekjes së të riut.
