Përgatiti: Pranvera Krasniqi
Me synimin që të rinjtë të jenë më aktivë dhe më të shëndetshëm të premten është lansuar programi kombëtar “Sport në Shkolla”, në komunën e Podujevës.
“Jemi mbledhur këtu së bashku për të shënuar fillimin e programit ‘Sport në Shkolla’, nismë kjo e cila synon fuqizimin e nxënësve dhe të rinjve tanë përmes ndërlidhjes së arsimit me sportin dhe të sportit me shëndetin. Ministria e Kulturës, Rinisë dhe Sportit në bashkëpunim me Ministrinë e Arsimit dhe federatat sportive kanë hartuar programin ‘Sport në Shkolla’ i cili ka për qëllim ndërtimin e një shoqërie aktive dhe të shëndetshme”, tha kryeministri i Kosovës, Albin Kurti.
Gjatë qëndrimit në këtë komunë, kryeministri Albin Kurti mori pjesë edhe në vënien e gurthemelit për ndërtimin e Qendrës Rezidenciale për persona të moshuar.
“Do ta ketë edhe bujtinën andaj do të jetë moderne në çdo aspekt me kushte tejet të mira për ata të moshuar të cilët do ta gëzojnë pleqërinë e tyre këtu me këtë rast e falënderoj Halil Kastratin e falënderoj Komunën e Podujevës dhe falënderojë të gjithë këta veprimtarë e personalitete që janë këtu me neve në këtë përurim sot. Duhet të kujdesimi për të gjitha shtresat e popullsisë për të gjitha moshat në vendin tonë”, tha Kurti.
Në këtë projekt, të investuar rreth dy milionë euro nga organizata humanitare “Jetimet e Ballkanit”, komuna e Podujevës ka kontribuar me vetëm rreth 530 mijë euro.
Kjo është një shenjë që po tregojmë përveç investime që po i bëjmë në infrastrukture publike shkollore, është radha të mendojmë edhe për këtë kategorie të moshuarave. Këtu do të kenë mundësin qe te marrin shërbime përafërsisht 100 të moshuar brenda ditës”, tha kryetari i Podujevës, Shpejtim Bulliqi.
Qendra do të ofrojë qëndrim ditor për të moshuar, kuzhinë humanitare për nevojtarë dhe bujtinë për studentë.
