PËRGATITI: PRANVERA KRASNIQI
Në tregjet e druve në Prishtinë, një metër dru, kushton hiç më pak se 70 euro. Me të njëjtin çmim, shiteshin drutë në nëntor të vitit të kaluar, kur kërkesa ishte në kulmin e saj. Përderisa, qytetarët shprehin shqetësim për çmimet e larta të tyre, njohësit e fushës thonë se kjo është rezultat i mungesës së fuqisë punëtore për përgatitjen e druve për treg.
Në mes të korrikut, çmimi i druve nuk ka ndryshuar aspak nga dimri i kaluar.
Aktualisht 1 metër dru shitet 70 euro, njësoj sikurse në nëntor të vitit të kaluar, kur kërkesat për blerjen e tyre ishin të mëdha.
Qytetarët të cilët furnizohen me dru që në muajt e verës, shprehin shqetësime për çmimet e larta të tyre.
“Problem, shumë shtrenjtë…”
“Nuk është në rregull, në mes të verës çmimi kaq i lartë”.
“Duhet me u ul ky çmim”.
Në Agjencinë e Pylltarisë së Kosovës thonë se në ngritjen e çmimeve po ndikon mungesa e fuqisë punëtore për përgatitjen e druve për treg.
“Çmimi është pak i lartë, mirëpo një rol të madh e luan edhe mungesa e punëtoreve për me ardhë me punu në pyll e me përgatit drurin po prapëseprapë çmimi është i papërballueshëm”.
Ndërkaq, Agjencia e Pylltarisë së Kosovës çdo vit hap konkurs për procedura të rregullta në blerjen e druve me çmime më të volitshme.
“Në e hapim konkursin për pesë ditë, i pranojmë diku rreth 700 palë i kontraktojmë, vijnë në pyll marrin drutë me çmime të vogla”.
Në rritjen e çmimit të druve ka ndikuar edhe inflacioni më të cilin u përball vendi vitin e kaluar.
