Miratohet kredia prej 90 miliardë eurosh për Ukrainën nga BE-ja

Ukraina ka njoftuar se ka rifilluar pompimin e naftës ruse përmes një tubacioni drejt Hungarisë dhe Sllovakisë, duke i dhënë fund një bllokimi disa mujor që lidhej me një kredi prej 90 miliardë eurosh, e konsideruar jetike nga Bashkimi Evropian për Kievin.

Pas këtij zhvillimi, ambasadorët e BE-së, të mbledhur në Qipro, dhanë miratimin paraprak për kredinë dhe për paketën e 20-të të sanksioneve ndaj Rusisë, sipas zyrtarëve të cituar nga BBC, transmeton EO.

Udhëheqësit e BE-së pritet ta formalizojnë vendimin në një samit informal të enjten.

Megjithëse marrëveshja për financimin ishte arritur që në dhjetor, kryeministri në largim i Hungarisë, Viktor Orban, kishte vendosur veto në shkurt, pasi Ukraina njoftoi se furnizimet ishin ndërprerë si pasojë e dëmeve.